wo jis ko humne apnaya bahut hai

vo jis ko ham ne apnāyā bahut hai

usī ne dil ko taḌpāyā bahut hai

hamāre qatl kī sāzish ke darpai

hamārā nek ham-sāya bahut hai

dil-e-dard-āshnā shauq-e-shahādat

mohabbat meñ ye sarmāya bahut hai

ajab shai hai chaman-zār-e-tamannā

samar koī nahīñ saaya bahut hai

ḳhatā us kī nahīñ dil ko hamīñ ne

tamannāoñ meñ uljhāyā bahut hai

ḳhudā mahfūz rakhe āsmāñ ko

zamīñ ko is ne jhulsāyā bahut hai

tirī yaad aa.ī hai to aaj ham ko

dil-e-gum-gashta yaad aayā bahut hai

ba-nām-e-hazrat-e-nāseh bhī ik jaam

ki us ne va.az farmāyā bahut hai

na kyuuñ Thukrā.eñ ham duniyā ko 'sāhir'

hameñ bhī us ne Thukrāyā bahut hai

wo jis ko hum ne apnaya bahut hai

usi ne dil ko taDpaya bahut hai

hamare qatl ki sazish ke darpai

hamara nek ham-saya bahut hai

dil-e-dard-ashna shauq-e-shahadat

mohabbat mein ye sarmaya bahut hai

ajab shai hai chaman-zar-e-tamanna

samar koi nahin saya bahut hai

KHata us ki nahin dil ko hamin ne

tamannaon mein uljhaya bahut hai

KHuda mahfuz rakhe aasman ko

zamin ko is ne jhulsaya bahut hai

teri yaad aai hai to aaj hum ko

dil-e-gum-gashta yaad aaya bahut hai

ba-nam-e-hazrat-e-naseh bhi ek jam

ki us ne waz farmaya bahut hai

na kyun Thukraen hum duniya ko 'sahir'

hamein bhi us ne Thukraya bahut hai