وہ جو اپنے واسطے اک خاص منظر ڈھونڈھتا ہے

وہ جو اپنے واسطے اک خاص منظر ڈھونڈھتا ہے

وہ یقیناً کچھ نہ کچھ اپنے برابر ڈھونڈھتا ہے

جانے کس کس سے نگر میں آج کل ناراض ہے وہ

ہر بشر میں جو وفاداری کا پیکر ڈھونڈھتا ہے

ڈوب جاتی ہے تلاطم کو جو اپنے ساتھ لے کر

ایسی کشتی کو ہر اک جانب سمندر ڈھونڈھتا ہے

پھول سے نازک وہ ہوتا ہے زمانے بھر کی خاطر

اپنے سر کے واسطے جو سخت پتھر ڈھونڈھتا ہے

ان سوالوں کی چبھن کیا چیز ہے عابدؔ سے پوچھو

آدمی جن کے جواب اپنے ہی اندر ڈھونڈھتا ہے