wo jo apni zat mein rakhte hain uryani ka shor

vo jo apnī zaat meñ rakhte haiñ uryānī kā shor

ḳhuld se aa.e haiñ le ke rūh-e-yazdānī kā shor

dasht meñ rahte haiñ pyāse aur darīche vā kiye

ḳhush huā karte haiñ sun ke duur se paanī kā shor

ek laḌkī chūḌiyāñ khankā rahī thī aur tabhī

us khanak se uTh rahā thā jaise zindānī kā shor

har kisī kā ek lā-zāhir muqarrab hai magar

dushman-e-daurān-e-duniyā meñ hai burhānī kā shor

mere ghar ke bām-o-dar sab ban ga.e haiñ qissa-go

hai mohabbat kī ḳhamoshī aur pashemānī kā shor

zabt-e-ġham ko tuul de jab ziist kī yaksāniyat

maut kī āvāz se aatā hai āsānī kā shor

maiñ parī-paikar huuñ lekin be-zabāñ hargiz nahīñ

saarī duniyā ne sunā hai zarf-e-nisvānī kā shor

vo mujassam ḳhush-badan yuuñ to suḳhanvar hai magar

us ke andar gūñjtā hai ramz-e-pinhānī kā shor

sab sitāre jhilmilā.e chāñd kī āġhosh meñ

jab añdhere meñ vo laayā apnī tābānī kā shor

us ne parbat par sadā dī jā ke mujh ko 'ā.isha'

aur vahāñ se lauT aayā merī vīrānī kā shor

wo jo apni zat mein rakhte hain uryani ka shor

KHuld se aae hain le ke ruh-e-yazdani ka shor

dasht mein rahte hain pyase aur dariche wa kiye

KHush hua karte hain sun ke dur se pani ka shor

ek laDki chuDiyan khanka rahi thi aur tabhi

us khanak se uTh raha tha jaise zindani ka shor

har kisi ka ek la-zahir muqarrab hai magar

dushman-e-dauran-e-duniya mein hai burhani ka shor

mere ghar ke baam-o-dar sab ban gae hain qissa-go

hai mohabbat ki KHamoshi aur pashemani ka shor

zabt-e-gham ko tul de jab zist ki yaksaniyat

maut ki aawaz se aata hai aasani ka shor

main pari-paikar hun lekin be-zaban hargiz nahin

sari duniya ne suna hai zarf-e-niswani ka shor

wo mujassam KHush-badan yun to suKHanwar hai magar

us ke andar gunjta hai ramz-e-pinhani ka shor

sab sitare jhilmilae chand ki aaghosh mein

jab andhere mein wo laya apni tabani ka shor

us ne parbat par sada di ja ke mujh ko 'aisha'

aur wahan se lauT aaya meri virani ka shor