wo jo bhi baKHshen wo inam le liya jae

vo jo bhī baḳhsheñ vo in.aam le liyā jaa.e

malāl hī dil-e-nākām le liyā jaa.e

baḌā maza hameñ is bandagī meñ hāsil ho

jo sub.h o shaam tirā naam le liyā jaa.e

rahe na tā.er-e-sidra bhī apnī zad se duur

use bhī aao tah-e-dām le liyā jaa.e

hamārī jaan se ġham ne liye hazāroñ kaam

hamārī ḳhaak se bhī kaam le liyā jaa.e

muravvatoñ se adāvat badal to saktī hai

agar ḳhulūs se kuchh kaam le liyā jaa.e

ye chashm-e-mast tirī sāqi-e-hayāt-afroz

ye tujh se kyuuñ na tirā jaam le liyā jaa.e

baḌā kamāl ham is baat meñ samajhte haiñ

baḳhīl logoñ se in.aam le liyā jaa.e

sazā se pahle ye hākim ko chāhiye ai 'ramz'

bayān-e-maurid-e-ilzām le liyā jaa.e

wo jo bhi baKHshen wo inam le liya jae

malal hi dil-e-nakaam le liya jae

baDa maza hamein is bandagi mein hasil ho

jo subh o sham tera nam le liya jae

rahe na taer-e-sidra bhi apni zad se dur

use bhi aao tah-e-dam le liya jae

hamari jaan se gham ne liye hazaron kaam

hamari KHak se bhi kaam le liya jae

murawwaton se adawat badal to sakti hai

agar KHulus se kuchh kaam le liya jae

ye chashm-e-mast teri saqi-e-hayat-afroz

ye tujh se kyun na tera jam le liya jae

baDa kamal hum is baat mein samajhte hain

baKHil logon se inam le liya jae

saza se pahle ye hakim ko chahiye ai 'ramz'

bayan-e-maurid-e-ilzam le liya jae