wo jo din hijr-e-yar mein guzre

vo jo din hijr-e-yār meñ guzre

kuchh taḌap kuchh qarār meñ guzre

vahī hāsil the zindagānī ke

chaar din jo bahār meñ guzre

kyā kiyā tum se kaise kaise vahm

dil-e-be-e'tibār meñ guzre

kitnī kaliyoñ ke kitne phūloñ ke

qāfile nau-bahār meñ guzre

zindagī ke liye mile the jo din

maut ke intizār meñ guzre

hasratoñ ke hujūm meñ tirī yaad

jaise mahmil ġhubār meñ guzre

ham chaman meñ rahe to aise rahe

jaise din ḳhārzār meñ guzre

ġham-e-jānāñ se bach rahe the jo din

vo ġham-e-rozgār meñ guzre

zindagī kī yahī tamannā thī

aap kī rahguzār meñ guzre

jāñ-nisāroñ kā jā.eza thā vahāñ

ham bhī pichhlī qatār meñ guzre

kaaTe kaTtā nahīñ vo vaqt 'razā'

jo kisī intizār meñ guzre

wo jo din hijr-e-yar mein guzre

kuchh taDap kuchh qarar mein guzre

wahi hasil the zindagani ke

chaar din jo bahaar mein guzre

kya kiya tum se kaise kaise wahm

dil-e-be-e'tibar mein guzre

kitni kaliyon ke kitne phulon ke

qafile nau-bahaar mein guzre

zindagi ke liye mile the jo din

maut ke intizar mein guzre

hasraton ke hujum mein teri yaad

jaise mahmil ghubar mein guzre

hum chaman mein rahe to aise rahe

jaise din KHarzar mein guzre

gham-e-jaanan se bach rahe the jo din

wo gham-e-rozgar mein guzre

zindagi ki yahi tamanna thi

aap ki rahguzar mein guzre

jaan-nisaron ka jaeza tha wahan

hum bhi pichhli qatar mein guzre

kaTe kaTta nahin wo waqt 'raza'

jo kisi intizar mein guzre