wo jo guftugu mein sharik the bhala kaise mujhse bigaD gae

vo jo guftugū meñ sharīk the bhalā kaise mujh se bigaḌ ga.e

mirī umr bhar ke mukālme usī ek baat pe aḌ ga.e

vo jo chāhatoñ ke amiin the vo jo har kisī kā yaqīn the

vo jo zindagī se hasīn the vahī log ham se bichhaḌ ga.e

jinheñ āñdhiyoñ ne khaḌā kiyā jinheñ ḳhud havā ne baḌā kiyā

baḌī ḳhāmushī se guzashta shab vahī peḌ jaḌ se ukhaḌ ga.e

tirī be-ruḳhī ke ḳhayāl se tire ek harf-e-savāl se

mirī ḳhvāhishoñ ke vo dā.ere jinheñ phailnā thā sukaḌ ga.e

tire jism se tire ism se tirī ik nazar ke tilism se

kabhī dil meñ vasvase jaag uThe kabhī ḳhvāb aañkh meñ jaḌ ga.e

na vo tāzgī mire dil meñ hai na vo raushnī hai nigāh meñ

mujhe us ne jab se bhulā diyā mire ḳhāl-o-ḳhad hī bigaḌ ga.e

wo jo guftugu mein sharik the bhala kaise mujh se bigaD gae

meri umr bhar ke mukalme usi ek baat pe aD gae

wo jo chahaton ke amin the wo jo har kisi ka yaqin the

wo jo zindagi se hasin the wahi log hum se bichhaD gae

jinhen aandhiyon ne khaDa kiya jinhen KHud hawa ne baDa kiya

baDi KHamushi se guzashta shab wahi peD jaD se ukhaD gae

teri be-ruKHi ke KHayal se tere ek harf-e-sawal se

meri KHwahishon ke wo daere jinhen phailna tha sukaD gae

tere jism se tere ism se teri ek nazar ke tilism se

kabhi dil mein waswase jag uThe kabhi KHwab aankh mein jaD gae

na wo tazgi mere dil mein hai na wo raushni hai nigah mein

mujhe us ne jab se bhula diya mere KHal-o-KHad hi bigaD gae