wo jo ham-rahi ka ghurur tha wo sawad-e-rah mein jal-bujha

vo jo ham-rahī kā ġhurūr thā vo savād-e-rāh meñ jal-bujhā

tū havā ke ishq meñ ghul gayā maiñ zamīñ kī chaah meñ jal-bujhā

ye jo shāḳh-e-lab pe hujūm-e-rañg-e-sadā khilā hai galī galī

kahīñ koī sho.ala-e-be-navā kisī qatl-gāh meñ jal-bujhā

jo kitāb-e-ishq ke baab the tirī dastaras meñ bikhar ga.e

vo jo ahd-nāma-e-ḳhvāb thā vo mirī nigāh meñ jal-bujhā

hameñ yaad ho to sunā.eñ bhī zarā dhyān ho to batā.eñ bhī

ki vo dil jo mahram-e-rāz thā kahāñ rasm-o-rāh meñ jal-bujhā

kahīñ be-niyāzī kī laag meñ kahīñ ehtiyāt kī aag meñ

tujhe merī koī ḳhabar bhī hai mire ḳhair-ḳhvāh maiñ jal-bujhā

mirī raakh se na.ī raushnī kī hikāyatoñ ko sameT le

maiñ charāġh-e-sub.h-e-visāl thā tirī ḳhema-gāh meñ jal-bujhā

vo jo harf-e-tāza-misāl the unheñ jab se tū ne bhulā diyā

tirī bazm-e-nāz kā bāñkpan kisī ḳhānqāh meñ jal-bujhā

wo jo ham-rahi ka ghurur tha wo sawad-e-rah mein jal-bujha

tu hawa ke ishq mein ghul gaya main zamin ki chah mein jal-bujha

ye jo shaKH-e-lab pe hujum-e-rang-e-sada khila hai gali gali

kahin koi shoala-e-be-nawa kisi qatl-gah mein jal-bujha

jo kitab-e-ishq ke bab the teri dastaras mein bikhar gae

wo jo ahd-nama-e-KHwab tha wo meri nigah mein jal-bujha

hamein yaad ho to sunaen bhi zara dhyan ho to bataen bhi

ki wo dil jo mahram-e-raaz tha kahan rasm-o-rah mein jal-bujha

kahin be-niyazi ki lag mein kahin ehtiyat ki aag mein

tujhe meri koi KHabar bhi hai mere KHair-KHwah main jal-bujha

meri rakh se nai raushni ki hikayaton ko sameT le

main charagh-e-subh-e-visal tha teri KHema-gah mein jal-bujha

wo jo harf-e-taza-misal the unhen jab se tu ne bhula diya

teri bazm-e-naz ka bankpan kisi KHanqah mein jal-bujha