wo jo log ahl-e-kamal the wo kahan gae

vo jo log ahl-e-kamāl the vo kahāñ ga.e

vo jo aap apnī misāl the vo kahāñ ga.e

mire dil meñ rah ga.ī sirf hairat-e-ā.ina

vo jo naqsh the ḳhad-o-ḳhāl the vo kahāñ ga.e

girī āsmāñ se to ḳhaak ḳhaak meñ aa milī

kabhī ḳhaak meñ par-o-bāl the vo kahāñ ga.e

sar-e-jāñ ye kyuuñ faqat ek shaam Thahar ga.ī

shab-o-roz the mah-o-sāl the vo kahāñ ga.e

mire zehn kā ye shajar udaas udaas hai

vo jo tā.irān-e-ḳhayāl the vo kahāñ ga.e

wo jo log ahl-e-kamal the wo kahan gae

wo jo aap apni misal the wo kahan gae

mere dil mein rah gai sirf hairat-e-aina

wo jo naqsh the KHad-o-KHal the wo kahan gae

giri aasman se to KHak KHak mein aa mili

kabhi KHak mein par-o-baal the wo kahan gae

sar-e-jaan ye kyun faqat ek sham Thahar gai

shab-o-roz the mah-o-sal the wo kahan gae

mere zehn ka ye shajar udas udas hai

wo jo tairan-e-KHayal the wo kahan gae