wo jo mahfil mein KHub hansta tha

vo jo mahfil meñ ḳhuub hañstā thā

haa.e vo shaḳhs kitnā tanhā thā

chup kā ye tajraba bhī kaisā thā

saarā ghar saa.eñ saa.eñ kartā thā

tum se rūThā to thā zarūr magar

ḳhud se Dar kar maiñ ghar se bhāgā thā

jitne aañsū the mere apne the

aur har qahqaha parāyā thā

husn kyā zehn kī zarūrat thī

ishq kyā jism kā taqāzā thā

pak chukī fasl kaaT ab is ko

khet vahmoñ kā tū ne boyā thā

tum ne jis kī duā.eñ māñgī thiiñ

abr vo parbatoñ pe barsā thā

mere andar kā maiñ visāl kī shab

mujh se bhī tez tez dauḌā thā

haa.e vo din 'naresh' jab us ne

ḳhat na likhiye ye ḳhat meñ likkhā thā

wo jo mahfil mein KHub hansta tha

hae wo shaKHs kitna tanha tha

chup ka ye tajraba bhi kaisa tha

sara ghar saen saen karta tha

tum se ruTha to tha zarur magar

KHud se Dar kar main ghar se bhaga tha

jitne aansu the mere apne the

aur har qahqaha paraya tha

husn kya zehn ki zarurat thi

ishq kya jism ka taqaza tha

pak chuki fasl kaT ab is ko

khet wahmon ka tu ne boya tha

tum ne jis ki duaen mangi thin

abr wo parbaton pe barsa tha

mere andar ka main visal ki shab

mujh se bhi tez tez dauDa tha

hae wo din 'naresh' jab us ne

KHat na likhiye ye KHat mein likkha tha