wo jo milta tha kabhi mujhse bahaaron ki tarah

vo jo miltā thā kabhī mujh se bahāroñ kī tarah

aaj chubhtā hai nigāhoñ meñ vo ḳhāroñ kī tarah

vo bhī kyā shaḳhs hai jo qasr-e-tasavvur meñ mujhe

roz ārāsta kartā hai mazāroñ kī tarah

Dūbne hī nahīñ detā kabhī kashtī merī

ab bhī vo sāmne rahtā hai kināroñ kī tarah

laakh mahtāb mirī ziist meñ aa.e lekin

darmiyāñ tujh ko bhī dekhā hai sitāroñ kī tarah

us kī āñkhoñ ne 'ajab sehr kiyā hai ham par

rāt-bhar phirte rahe bāda-gusāroñ kī tarah

aap kī āñkhoñ se kuchh aur pata chaltā hai

aap dekhā na kareñ ham ko nazāroñ kī tarah

kis ko mā'lūm chhupā.e hai vo ḳhanjar kitne

vo jo zāhir meñ milā kartā hai yāroñ kī tarah

us ke chehre pe to narmī hai halāvat hai bahut

'sham.a' lahja hai magar us kā sharāroñ kī tarah

wo jo milta tha kabhi mujh se bahaaron ki tarah

aaj chubhta hai nigahon mein wo KHaron ki tarah

wo bhi kya shaKHs hai jo qasr-e-tasawwur mein mujhe

roz aarasta karta hai mazaron ki tarah

Dubne hi nahin deta kabhi kashti meri

ab bhi wo samne rahta hai kinaron ki tarah

lakh mahtab meri zist mein aae lekin

darmiyan tujh ko bhi dekha hai sitaron ki tarah

us ki aankhon ne 'ajab sehr kiya hai hum par

raat-bhar phirte rahe baada-gusaron ki tarah

aap ki aankhon se kuchh aur pata chalta hai

aap dekha na karen hum ko nazaron ki tarah

kis ko ma'lum chhupae hai wo KHanjar kitne

wo jo zahir mein mila karta hai yaron ki tarah

us ke chehre pe to narmi hai halawat hai bahut

'shama' lahja hai magar us ka shararon ki tarah