wo jo mubtala hai mohabbaton ke azab mein

vo jo mubtalā hai mohabbatoñ ke azaab meñ

koī phūTtā huā aabla hai hubāb meñ

mirā ishq shart-e-visāl se rahe muttasil

nahīñ dekhnā mujhe ḳhvāb-e-shab shab-e-ḳhvāb meñ

jo kashīd karne kā hausla hai to kījiye

ki hazār tarah kī rāhateñ haiñ azaab meñ

ye tavāf-e-ka.aba ye bosa sañg-e-siyāh kā

ye talāsh ab bhī hai pattharoñ ke hijāb meñ

baḌī lazzateñ haiñ gunāh meñ jo na kījiye

jo na pīji.e to ajab nasha hai sharāb meñ

sabhī uzr-hā-e-gunāh jab hue mustarad

to dalīl kaisī difā-e-kār-e-savāb meñ

wo jo mubtala hai mohabbaton ke azab mein

koi phuTta hua aabla hai hubab mein

mera ishq shart-e-visal se rahe muttasil

nahin dekhna mujhe KHwab-e-shab shab-e-KHwab mein

jo kashid karne ka hausla hai to kijiye

ki hazar tarah ki rahaten hain azab mein

ye tawaf-e-kaba ye bosa sang-e-siyah ka

ye talash ab bhi hai pattharon ke hijab mein

baDi lazzaten hain gunah mein jo na kijiye

jo na pijie to ajab nasha hai sharab mein

sabhi uzr-ha-e-gunah jab hue mustarad

to dalil kaisi difa-e-kar-e-sawab mein