wo jo patthar hain wahi shishon se wabasta rahen

vo jo patthar haiñ vahī shīshoñ se vābasta raheñ

ham kahāñ tak TūTte rishtoñ se vābasta raheñ

aap dohrāte raheñ sachchī kitāboñ kā kahā

aur lakīreñ an-ginat chehroñ se vābasta raheñ

rāt-din jin ke laboñ par ruuh kā parchā rahe

un ke dil meñ hai na.e jismoñ se vābasta raheñ

ab ubharte jaa.e haiñ har har taraf manzar na.e

kyoñ nigāheñ aap ke katboñ se vābasta raheñ

hāl-o-māzī kā ta'alluq Thiik rakhnā hai agar

kal ke bachche aaj ke bachchoñ se vābasta raheñ

aap tā’bīroñ kī ‘ismat lūTte rahiye huzūr

aur mirī āñkheñ yūñhī ḳhvāboñ se vābasta raheñ

dā.eroñ kī qaid se bāhar nikalne ke liye

ye zarūrī hai ka.ī nasloñ se vābasta raheñ

wo jo patthar hain wahi shishon se wabasta rahen

hum kahan tak TuTte rishton se wabasta rahen

aap dohraate rahen sachchi kitabon ka kaha

aur lakiren an-ginat chehron se wabasta rahen

raat-din jin ke labon par ruh ka parcha rahe

un ke dil mein hai nae jismon se wabasta rahen

ab ubharte jae hain har har taraf manzar nae

kyon nigahen aap ke katbon se wabasta rahen

haal-o-mazi ka ta'alluq Thik rakhna hai agar

kal ke bachche aaj ke bachchon se wabasta rahen

aap ta’biron ki ‘ismat luTte rahiye huzur

aur meri aankhen yunhi KHwabon se wabasta rahen

daeron ki qaid se bahar nikalne ke liye

ye zaruri hai kai naslon se wabasta rahen