wo jo phul the teri yaad ke tah-e-dast-e-Khaar chale gae

vo jo phuul the tirī yaad ke tah-e-dast-e-ḳhār chale ga.e

tire shahr meñ bhī sukūn hai tire be-qarār chale ga.e

na vo ashk ab na vo aable na vo chīḳhtī huī dhaḌkaneñ

mirī zaat se tire dard ke sabhī ishtihār chale ga.e

na vo yaad hai na vo hijr hai na nigāh-e-nāz kā zikr hai

mire zehn se tirī fikr ke sabhī rozgār chale ga.e

the vo fitratan hī shahīd-ḳhū unheñ qātiloñ se bhī pyaar thā

kabhī maqtaloñ meñ kaTe the vo kabhī sū-e-dār chale ga.e

na badan bachā na lahū bachā na to jism kā koī mū bachā

koī jā ke kah de ye dard se vo tire shikār chale ga.e

yuuñ abas kisī ko sadā na do dil-e-zār ko ye batā bhī do

kabhī ab na ā.eñge lauT kar vo jo ek baar chale ga.e

unheñ kyā lalak tire faiz kī unheñ kyā talab tire vasl kī

jo mizāj le ke faqīr kā sar-e-kū-e-yār chale ga.e

hai ye sach ki mausam-e-hijr meñ mirā ḳhaar ḳhaar badan huā

kabhī yaad tujh ko jo kar liyā to badan ke ḳhaar chale ga.e

na ḳhushī meñ ab vo surūr hai na to dard meñ vo nasha rahā

lo 'sahāb' bāda-e-ishq ke vo sabhī ḳhumār chale ga.e

wo jo phul the teri yaad ke tah-e-dast-e-KHar chale gae

tere shahr mein bhi sukun hai tere be-qarar chale gae

na wo ashk ab na wo aable na wo chiKHti hui dhaDkanen

meri zat se tere dard ke sabhi ishtihaar chale gae

na wo yaad hai na wo hijr hai na nigah-e-naz ka zikr hai

mere zehn se teri fikr ke sabhi rozgar chale gae

the wo fitratan hi shahid-KHu unhen qatilon se bhi pyar tha

kabhi maqtalon mein kaTe the wo kabhi su-e-dar chale gae

na badan bacha na lahu bacha na to jism ka koi mu bacha

koi ja ke kah de ye dard se wo tere shikar chale gae

yun abas kisi ko sada na do dil-e-zar ko ye bata bhi do

kabhi ab na aaenge lauT kar wo jo ek bar chale gae

unhen kya lalak tere faiz ki unhen kya talab tere wasl ki

jo mizaj le ke faqir ka sar-e-ku-e-yar chale gae

hai ye sach ki mausam-e-hijr mein mera KHar KHar badan hua

kabhi yaad tujh ko jo kar liya to badan ke KHar chale gae

na KHushi mein ab wo surur hai na to dard mein wo nasha raha

lo 'sahab' baada-e-ishq ke wo sabhi KHumar chale gae