وہ جو راتوں کی تنہائیوں میں لکھے چاہتوں کے صحیفے سبھی پھٹ گئے

وہ جو راتوں کی تنہائیوں میں لکھے چاہتوں کے صحیفے سبھی پھٹ گئے

ہم پہ ہنستے رہے وہ سبھی راستے ہم جہاں بھی تری سن کے آہٹ گئے

رنجشیں ہر طرف ہی پنپنے لگیں پیار کے راستے بند ہونے لگے

شہر میں نفرتوں کی ہوا جب چلی بغض کی گرد سے ذہن و دل اٹ گئے

دیکھتے دیکھتے جانتے بوجھتے یہ جدائی ہمارا مقدر ہوئی

پہلے سوچیں بٹیں پھر سفر بٹ گیا زاد رہ جب بٹا راستے بٹ گئے

دوستوں کی وفاؤں پہ نازان تھے اتنا پوجا کہ ان کو خدا کر دیا

خود کو ادنیٰ کیا ان کو اعلیٰ کیا سر جھکائے گئے اور سر کٹ گئے

میں نے سوچا ہے اکثر ہی اس بات پر کیسا آسیب چھایا ہے ہر ذات پر

دن جو نکلا تو سائے تھے قد سے بڑے شام ہوتے ہی جسموں سے کیوں گھٹ گئے

تیر پہنچے نہ دشمن کے خیموں تلک اپنے یاروں کی دیکھی ذرا سی جھلک

یار اپنا مقدر تو ہونا ہی تھا جب ہمارے مقابل ہی وہ ڈٹ گئے

آپ کا ساتھ ہی ہم کو مطلوب تھا آپ کی راہ کا سنگ ہرگز نہ تھا

آپ نے جب کہا ساتھ ہی چل دئے آپ نے جب کہا راہ سے ہٹ گئے

اس برس پیار میں پھر خسارہ ہوا ہم نے سوچا تھا انمول ہو جائے گا

اس جہاں میں ہر اک شے کی قیمت بڑھی اس برس پیار کے دام پھر گھٹ گئے

بیج بوئے گئے خوں پلائے گئے ان کی چھاؤں میں جیون بتائے گئے

میرے گاؤں میں بسنے لگی بھوک تو پیڑ جتنے پرانے تھے سب کٹ گئے

کس نے لکھی یہ قسمت کی تحریر تھی یا کہ ان کی یہ اپنی ہی تقصیر تھی

جن کی اونچی فلک سے بھی پرواز تھی ان پرندوں کے اکثر ہی پر کٹ گئے