wo jo shaKHs apne hi taD mein so chhupa hai dil hi ki aaD mein

vo jo shaḳhs apne hī taaḌ meñ so chhupā hai dil hī kī aaḌ meñ

na vo bastī meñ na ujaaḌ meñ na vo jhaaḌ meñ na pahāḌ meñ

mujhe kaam tujh se hai ai junūñ na kahūñ kisī se na kuchh sunūñ

na kisī kī radd-o-qadah meñ huuñ na ukhāḌ meñ na pachhāḌ meñ

ye sabā ne qais se aa kahā ki sunā kuchh aur bhī mājrā

tire paas se jo chalā gayā to khaḌā hai naaqa ujaaḌ meñ

are aah tū ne ġhazab kiyā mire dil ko mujh se tuḌā liyā

mirī jī ko le ke jalā diyā paḌī iḳhtilāt ye pahāḌ meñ

ḳhafagī bhī turfa hai ek shai paḌe qisse hote haiñ lākhoñ tai

vo kahāñ milāp meñ lutf hai jo maza hai un kī bigāḌ meñ

mizha par hai pārā-e-dil thañbā vo masal huī hai ab ai ḳhudā

ki daraḳht se jo kabhī girā to vo aTkā un ke hī jhaaḌ meñ

kahīñ khiḌkiyoñ kī taraf bañdhī mirī TikTikī to ai lo abhī

gul-e-nargis aa ke lagā ga.ī vo parī har ek darāḌ meñ

mirī dil meñ nashshe kā hai makāñ mujhe sūjhtī haiñ vo mastiyāñ

ki khajūrī choTiyoñ vāliyāñ paḌī phirtī haiñ mire taaḌ meñ

baḌī dāḌhiyoñ pe na jā dilā ye sab āhūoñ kī haiñ mubtalā

ye shikār kaise haiñ barmalā inhīñ TaTTiyoñ kī to aaḌ meñ

khaḌī jhāñktī hai vahī parī nahīñ shub.h is meñ to vāqa.ī

vo jo itr-e-fitna kī baas thī so rachī huī hai kivāḌ meñ

na kar apnī jaan ko muzmahil are 'inshā' un se lagā na dil

tū digar na hovegā munfa.il kahīñ aa gayā jo latāḌ meñ

wo jo shaKHs apne hi taD mein so chhupa hai dil hi ki aaD mein

na wo basti mein na ujaD mein na wo jhaD mein na pahaD mein

mujhe kaam tujh se hai ai junun na kahun kisi se na kuchh sunun

na kisi ki radd-o-qadah mein hun na ukhaD mein na pachhaD mein

ye saba ne qais se aa kaha ki suna kuchh aur bhi majra

tere pas se jo chala gaya to khaDa hai naqa ujaD mein

are aah tu ne ghazab kiya mere dil ko mujh se tuDa liya

meri ji ko le ke jala diya paDi iKHtilat ye pahaD mein

KHafagi bhi turfa hai ek shai paDe qisse hote hain lakhon tai

wo kahan milap mein lutf hai jo maza hai un ki bigaD mein

mizha par hai para-e-dil thanba wo masal hui hai ab ai KHuda

ki daraKHt se jo kabhi gira to wo aTka un ke hi jhaD mein

kahin khiDkiyon ki taraf bandhi meri TikTiki to ai lo abhi

gul-e-nargis aa ke laga gai wo pari har ek daraD mein

meri dil mein nashshe ka hai makan mujhe sujhti hain wo mastiyan

ki khajuri choTiyon waliyan paDi phirti hain mere taD mein

baDi daDhiyon pe na ja dila ye sab aahuon ki hain mubtala

ye shikar kaise hain barmala inhin TaTTiyon ki to aaD mein

khaDi jhankti hai wahi pari nahin shubh is mein to waqai

wo jo itr-e-fitna ki bas thi so rachi hui hai kiwaD mein

na kar apni jaan ko muzmahil are 'insha' un se laga na dil

tu digar na howega munfail kahin aa gaya jo lataD mein