wo jo the dar-ba-dar chune humne

vo jo the dar-ba-dar chune ham ne

apne jaise hī ghar chune ham ne

sab samundar nigal ga.e dekho

kitne gahre bhañvar chune ham ne

raat meñ ham-safar ke qadmoñ se

kuchh nujūm-o-qamar chune ham ne

ḳhvāb meñ ghar girā hue bedār

aur dīvār-o-dar chune ham ne

dhūp-chhāñv bikhar ga.e mil kar

phir ye shām-o-sahar chune ham ne

jab qafas se rihā hue panchhī

un ke kuchh bāl-o-par chune ham ne

jin pe lamhoñ ke koī phal na uge

vaqt ke vo shajar chune ham ne

Tuut kar din bikhar gayā saarā

phir ye āThoñ pahar chune ham ne

Duub kar niiñd ke samundar meñ

ḳhvāb ke kuchh guhar chune ham ne

manzileñ haiñ na rāste 'asrār'

kaise kaise safar chune ham ne

wo jo the dar-ba-dar chune hum ne

apne jaise hi ghar chune hum ne

sab samundar nigal gae dekho

kitne gahre bhanwar chune hum ne

raat mein ham-safar ke qadmon se

kuchh nujum-o-qamar chune hum ne

KHwab mein ghar gira hue bedar

aur diwar-o-dar chune hum ne

dhup-chhanw bikhar gae mil kar

phir ye sham-o-sahar chune hum ne

jab qafas se riha hue panchhi

un ke kuchh baal-o-par chune hum ne

jin pe lamhon ke koi phal na uge

waqt ke wo shajar chune hum ne

Tut kar din bikhar gaya sara

phir ye aaThon pahar chune hum ne

Dub kar nind ke samundar mein

KHwab ke kuchh guhar chune hum ne

manzilen hain na raste 'asrar'

kaise kaise safar chune hum ne