wo junun ke ahd ki chandni ye gahan gahan ki udasiyan

vo junūñ ke ahd kī chāñdnī ye gahan gahan kī udāsiyāñ

vo qafas qafas kī chahal-pahal ye chaman chaman kī udāsiyāñ

jo mahal ke jhaaḌ utaar lo to mile zamīñ ko bhī raushnī

inhīñ ḳhalvatoñ ne baḌhā.ī haiñ mirī anjuman kī udāsiyāñ

mirā dil hai dasht-e-ġham jahāñ kabhī aa ke sair to kījiye

ye junūñ junūñ kī musāfirat ye vatan vatan kī udāsiyāñ

mujhe kaise dasht meñ laa.e tum ki sadī sadī ke safar pe bhī

vahī rañg-o-nasl kī vahshateñ vahī mā-o-man kī udāsiyāñ

koī ai 'shamīm' kahe zarā ye udaas shā.ir-e-vaqt se

ki hayāt-e-dil ko bujhā na deñ kahīñ fikr-o-fan kī udāsiyāñ

wo junun ke ahd ki chandni ye gahan gahan ki udasiyan

wo qafas qafas ki chahal-pahal ye chaman chaman ki udasiyan

jo mahal ke jhaD utar lo to mile zamin ko bhi raushni

inhin KHalwaton ne baDhai hain meri anjuman ki udasiyan

mera dil hai dasht-e-gham jahan kabhi aa ke sair to kijiye

ye junun junun ki musafirat ye watan watan ki udasiyan

mujhe kaise dasht mein lae tum ki sadi sadi ke safar pe bhi

wahi rang-o-nasl ki wahshaten wahi ma-o-man ki udasiyan

koi ai 'shamim' kahe zara ye udas shair-e-waqt se

ki hayat-e-dil ko bujha na den kahin fikr-o-fan ki udasiyan