wo justuju ka juda hi hunar nikalte hain

vo justujū kā judā hī hunar nikālte haiñ

thakān se nayā zauq-e-safar nikālte haiñ

ham apnī chhāñv badan meñ hī dafn rakhte nahīñ

ki shāmlāt zamīñ se shajar nikālte haiñ

kahīñ ye nasl zamīñ-bos hī na ho jaa.e

numū ke ḳhvāb ko bār-e-digar nikālte haiñ

kahāñ talak koī ḳhud meñ simaT ke baiThā rahe

galī meñ aate haiñ ḳhauf-e-nazar nikālte haiñ

na kholnī paḌeñ dāñtoñ se rishtoñ kī girheñ

chalo ki apne lahū se bhañvar nikālte haiñ

mohabbateñ kahāñ panpeñgī sang-o-āhan meñ

kisī gulāb kī Tahnī pe ghar nikālte haiñ

rutoñ ke jabr ne jhulsā ke rakh diyā thā jahāñ

shagūfe phir usī Tahnī se sar nikālte haiñ

bhare bhare na bhare sā.atoñ ke dāman ko

nihāl-e-umr se saarā samar nikālte haiñ

ajiib zahr sā ghul jaatā hai fazāoñ meñ

hamāre ḳhvāb jahāñ bāl-o-par nikālte haiñ

wo justuju ka juda hi hunar nikalte hain

thakan se naya zauq-e-safar nikalte hain

hum apni chhanw badan mein hi dafn rakhte nahin

ki shamlat zamin se shajar nikalte hain

kahin ye nasl zamin-bos hi na ho jae

numu ke KHwab ko bar-e-digar nikalte hain

kahan talak koi KHud mein simaT ke baiTha rahe

gali mein aate hain KHauf-e-nazar nikalte hain

na kholni paDen danton se rishton ki girhen

chalo ki apne lahu se bhanwar nikalte hain

mohabbaten kahan panpengi sang-o-ahan mein

kisi gulab ki Tahni pe ghar nikalte hain

ruton ke jabr ne jhulsa ke rakh diya tha jahan

shagufe phir usi Tahni se sar nikalte hain

bhare bhare na bhare saaton ke daman ko

nihaal-e-umr se sara samar nikalte hain

ajib zahr sa ghul jata hai fazaon mein

hamare KHwab jahan baal-o-par nikalte hain