wo kabhi bistar kabhi chadar bichhate rah gae

vo kabhī bistar kabhī chādar bichhāte rah ga.e

niiñd kī āġhosh meñ ham jaate jaate rah ga.e

ham ne kaalī raat meñ saarā safar tai kar liyā

jin ke zimme raushnī thī chāñd laate rah ga.e

raat aa.ī chāñd niklā saare panchhī so ga.e

chāñdnī meñ ham magar dil ko jalāte rah ga.e

chāñd ne qīmat vasūlī chāñdnī kī bār-hā

ham sitāre āsmāñ par jhilmilāte rahe ga.e

aur ham karte bhī kyā us dil-shikan ke sāmne

sabr kī mūrat bane bas muskurāte rah ga.e

koī to ahl-e-vafā hogā isī ummīd par

umr bhar har ek se dhokā hī khāte rah ga.e

ai amīr-e-shahr terī aabrū kī fikr meñ

chand qisse mere lab par aate aate rah ga.e

ab ḳhayāl aayā hameñ 'tashna' ki ik muddat se ham

dāstān-e-ġham unheñ nā-haq sunāte rah ga.e

wo kabhi bistar kabhi chadar bichhate rah gae

nind ki aaghosh mein hum jate jate rah gae

hum ne kali raat mein sara safar tai kar liya

jin ke zimme raushni thi chand late rah gae

raat aai chand nikla sare panchhi so gae

chandni mein hum magar dil ko jalate rah gae

chand ne qimat wasuli chandni ki bar-ha

hum sitare aasman par jhilmilate rahe gae

aur hum karte bhi kya us dil-shikan ke samne

sabr ki murat bane bas muskuraate rah gae

koi to ahl-e-wafa hoga isi ummid par

umr bhar har ek se dhoka hi khate rah gae

ai amir-e-shahr teri aabru ki fikr mein

chand qisse mere lab par aate aate rah gae

ab KHayal aaya hamein 'tashna' ki ek muddat se hum

dastan-e-gham unhen na-haq sunate rah gae