وہ کہہ رہے ہیں کہ یہ زیادتی ہے تھوڑی سی

وہ کہہ رہے ہیں کہ یہ زیادتی ہے تھوڑی سی

ابھی تو مشق ستم ہم نے کی ہے تھوڑی سی

مری روش میں ابھی کجروی ہے تھوڑی سی

سنا ہے ایسی ہوا بھی اڑی ہے تھوڑی سی

کہیں یہ ترک تعلق کی ابتدا تو نہیں

اب اس کی یاد سے وابستگی ہے تھوڑی سی

قریب جو تھے مرے وہ قریب تر نہ ہوئے

مرے خلوص میں شاید کمی ہے تھوڑی سی

ذرا تو اتنی ہی پی کر تو دیکھ اے واعظ

جو میرے جام کی تہہ میں بچی ہے تھوڑی سی

خدا ملے گا نہ اس وقت تک تمہیں صابرؔ

جنون شوق میں جب تک خودی ہے تھوڑی سی