wo kahte hain yaqin lana paDega

vo kahte haiñ yaqīñ laanā paḌegā

ye dhoka jaan kar khānā paḌegā

zamāne ko badalnā ham ne Thānā

zamāne ko badal jaanā paḌegā

salāmat hai hamārā jazb-e-ulfat

tum aaoge tumheñ aanā paḌegā

yahī marzī hai us ārām-e-jāñ kī

hameñ ab jaan se jaanā paḌegā

dil-e-nādāñ samajh jā.egā lekin

dil-e-nādāñ ko samjhānā paḌegā

adū ke naaz uThte kaun dekhe

tirī mahfil meñ uTh jaanā paḌegā

nahīñ ai sañg-e-dil haañ vo nahīñ tū

kiye par jis ko pachhtānā paḌegā

baḌā bad-rāh hai charḳh-e-sitamgar

use ab raah par laanā paḌegā

paḌā hai ai 'vafā' paalā butoñ se

ḳhudā ko darmiyāñ laanā paḌegā

wo kahte hain yaqin lana paDega

ye dhoka jaan kar khana paDega

zamane ko badalna hum ne Thana

zamane ko badal jaana paDega

salamat hai hamara jazb-e-ulfat

tum aaoge tumhein aana paDega

yahi marzi hai us aaram-e-jaan ki

hamein ab jaan se jaana paDega

dil-e-nadan samajh jaega lekin

dil-e-nadan ko samjhana paDega

adu ke naz uThte kaun dekhe

teri mahfil mein uTh jaana paDega

nahin ai sang-e-dil han wo nahin tu

kiye par jis ko pachhtana paDega

baDa bad-rah hai charKH-e-sitamgar

use ab rah par lana paDega

paDa hai ai 'wafa' pala buton se

KHuda ko darmiyan lana paDega