wo kam-yaqin jo sawad-e-guman bhi rahta hai

vo kam-yaqīñ jo savād-e-gumāñ bhī rahtā hai

tamām-umr kisī imtihāñ meñ rahtā hai

ye rūh-o-jism kā rishta bhī ḳhuub rishta hai

ki jaise koī parā.e makāñ meñ rahtā hai

jo tū nahīñ mire hamrāh terī yaad sahī

koī to saath mire dasht-e-jāñ meñ rahtā hai

khulā ye chāñdnī shab meñ ki ek saaya sā

nadī ke paar shikasta-makāñ meñ rahtā hai

na us meñ rañg-e-vafā kā na ishq kī ḳhushbū

ḳhabar nahīñ vo abhī kis jahāñ meñ rahtā hai

rahe zabāñ pe koī dastān-e-hijr-o-visāl

vo ek shaḳhs hī lafz-o-bayāñ meñ rahtā hai

mire dukhoñ kī jise kuchh ḳhabar nahīñ 'ḳhāvar'

mire makāñ ke barābar makāñ meñ rahtā hai

wo kam-yaqin jo sawad-e-guman bhi rahta hai

tamam-umr kisi imtihan mein rahta hai

ye ruh-o-jism ka rishta bhi KHub rishta hai

ki jaise koi parae makan mein rahta hai

jo tu nahin mere hamrah teri yaad sahi

koi to sath mere dasht-e-jaan mein rahta hai

khula ye chandni shab mein ki ek saya sa

nadi ke par shikasta-makan mein rahta hai

na us mein rang-e-wafa ka na ishq ki KHushbu

KHabar nahin wo abhi kis jahan mein rahta hai

rahe zaban pe koi dastan-e-hijr-o-visal

wo ek shaKHs hi lafz-o-bayan mein rahta hai

mere dukhon ki jise kuchh KHabar nahin 'KHawar'

mere makan ke barabar makan mein rahta hai