wo karb jo azal se nihan rahguzar mein tha

vo karb jo azal se nihāñ rahguzar meñ thā

manzil kī pyaas ban ke hamāre jigar meñ thā

Takrā ke sang-e-vaqt se vo ḳhud-baḳhud girā

ik raḳhsh vahm kā jo azal se safar meñ thā

tum vus.at-e-falak meñ mujhe DhūñDte rahe

jab maiñ ḳhud is zamīn ke har ḳhushk-o-tar meñ thā

zulmat kī tez dhuup se us ne bachā liyā

ik peḌ raushnī kā jo is rah guzar meñ thā

yuuñ ġhairiyat kā zard labāda thā jism par

har zarra kā.enāt kā apnī nazar meñ thā

gard-o-ġhubār vaqt se ye Dhak ke rah gayā

'jāmī' lahū kā rang jo dīvār-o-dar meñ thā

wo karb jo azal se nihan rahguzar mein tha

manzil ki pyas ban ke hamare jigar mein tha

Takra ke sang-e-waqt se wo KHud-baKHud gira

ek raKHsh wahm ka jo azal se safar mein tha

tum wusat-e-falak mein mujhe DhunDte rahe

jab main KHud is zamin ke har KHushk-o-tar mein tha

zulmat ki tez dhup se us ne bacha liya

ek peD raushni ka jo is rah guzar mein tha

yun ghairiyat ka zard labaada tha jism par

har zarra kaenat ka apni nazar mein tha

gard-o-ghubar waqt se ye Dhak ke rah gaya

'jami' lahu ka rang jo diwar-o-dar mein tha