وہ کرب جو ازل سے نہاں رہ گزر میں تھا

وہ کرب جو ازل سے نہاں رہ گزر میں تھا

منزل کی پیاس بن کے ہمارے جگر میں تھا

ٹکرا کے سنگ وقت سے وہ خود بخود گرا

اک رخش وہم کا جو ازل سے سفر میں تھا

تم وسعت فلک میں مجھے ڈھونڈتے رہے

جب میں خود اس زمین کے ہر خشک و تر میں تھا

ظلمت کی تیز دھوپ سے اس نے بچا لیا

اک پیڑ روشنی کا جو اس رہ گزر میں تھا

یوں غیریت کا زرد لبادہ تھا جسم پر

ہر ذرہ کائنات کا اپنی نظر میں تھا

گرد و غبار وقت سے یہ ڈھک کے رہ گیا

جامیؔ لہو کا رنگ جو دیوار و در میں تھا