wo karen mujh pe inayat ghalat

vo kareñ mujh pe ināyāt ġhalat

nāma-bar hai tirī ye baat ġhalat

ḳhvāb dekhā to nahīñ hai qāsid

mujh se vo aur mulāqāt ġhalat

mere dil ko na yaqīñ aa.egā

tum na the ġhair ke ghar raat ġhalat

ḳhair yūñhīñ sahī dushman sachchā

achchhā achchhā mirī har baat ġhalat

mere ashkoñ kī jhaḌī hai ye to

aap samjhe raheñ barsāt ġhalat

tum pe martā huuñ kahā jab to kahā

kyā ye baktā hai ḳhurāfāt ġhalat

shikva-e-ġhair pe jhuñjhlā ke kahā

maiñ na mānūñgā tirī baat ġhalat

mujh ko mahfil meñ jagah deñ vo jhuuT

ġhair kī ho na mudārāt ġhalat

maiñ to kahtā huuñ pate kī sāhib

tum kahe jaao tirī baat ġhalat

shikva-e-jor karūñ maiñ tauba

aap ke haiñ ye ḳhayālāt ġhalat

mai se aur tauba kare tū 'nashtar'

maiñ na mānūñgā tirī baat ġhalat

wo karen mujh pe inayat ghalat

nama-bar hai teri ye baat ghalat

KHwab dekha to nahin hai qasid

mujh se wo aur mulaqat ghalat

mere dil ko na yaqin aaega

tum na the ghair ke ghar raat ghalat

KHair yunhin sahi dushman sachcha

achchha achchha meri har baat ghalat

mere ashkon ki jhaDi hai ye to

aap samjhe rahen barsat ghalat

tum pe marta hun kaha jab to kaha

kya ye bakta hai KHurafat ghalat

shikwa-e-ghair pe jhunjhla ke kaha

main na manunga teri baat ghalat

mujh ko mahfil mein jagah den wo jhuT

ghair ki ho na mudaraat ghalat

main to kahta hun pate ki sahib

tum kahe jao teri baat ghalat

shikwa-e-jor karun main tauba

aap ke hain ye KHayalat ghalat

mai se aur tauba kare tu 'nashtar'

main na manunga teri baat ghalat