wo kaun hai fursat se mujhe yaad kare hai

vo kaun hai fursat se mujhe yaad kare hai

dil ġham se ho māmūr to vo shaad kare hai

phir dījiye dīvāne kī himmat ko zarā daad

vīrāne kā vīrāna jo ābād kare hai

sarmāya mohabbat kā tirī jis ne hai luuTā

kyā degā vo kyoñ us se tū fariyād kare hai

T v ke hasīñ ruup meñ hai kaisī taraqqī

kirdār javānoñ kā jo barbād kare hai

aa.egī kabhī sub.h-e-sukūñ-baḳhsh yahāñ bhī

ummīd yahī dard se āzād kare hai

ik shaan se kartī huuñ gavārā use har din

jo tarz-e-sitam roz vo ījād kare hai

vo jis ne kabhī zaḳhm khilā.e the 'shagufta'

kyā soch ke phir us ko hī tū yaad kare hai

wo kaun hai fursat se mujhe yaad kare hai

dil gham se ho mamur to wo shad kare hai

phir dijiye diwane ki himmat ko zara dad

virane ka virana jo aabaad kare hai

sarmaya mohabbat ka teri jis ne hai luTa

kya dega wo kyon us se tu fariyaad kare hai

T w ke hasin rup mein hai kaisi taraqqi

kirdar jawanon ka jo barbaad kare hai

aaegi kabhi subh-e-sukun-baKHsh yahan bhi

ummid yahi dard se aazad kare hai

ek shan se karti hun gawara use har din

jo tarz-e-sitam roz wo ijad kare hai

wo jis ne kabhi zaKHm khilae the 'shagufta'

kya soch ke phir us ko hi tu yaad kare hai