wo kaun hai jo halak-e-nigah-e-naz nahin

vo kaun hai jo halāk-e-nigāh-e-nāz nahīñ

maiñ kuchh nahīñ huuñ agar chashm-e-imtiyāz nahīñ

kamāl-e-ishq meñ bhī lazzat-e-majāz nahīñ

taḌap rahā huuñ magar dil meñ soz-o-sāz nahīñ

to kyuuñ vo garmī-e-mahfil vo dil-kashī na rahī

niyāz-mand agar jān-e-bazm-e-nāz nahīñ

ḳhalish ke saath taḌap hai taḌap ke saath ḳhalish

hamāre zāhir-o-bātin meñ imtiyāz nahīñ

ye vo kahe jo zamīroñ kā paḌhne vaalā hai

talab nahīñ hai jo dast-e-talab darāz nahīñ

abhī karam meñ yaqīnan sitam bhī shāmil hai

ki dil ma.āl-e-mohabbat se be-niyāz nahīñ

paḌā hai in se mohabbat kā vāsta 'naḳhshab'

ki jin ko ishq-o-havas meñ kuchh imtiyāz nahīñ

wo kaun hai jo halak-e-nigah-e-naz nahin

main kuchh nahin hun agar chashm-e-imtiyaz nahin

kamal-e-ishq mein bhi lazzat-e-majaz nahin

taDap raha hun magar dil mein soz-o-saz nahin

to kyun wo garmi-e-mahfil wo dil-kashi na rahi

niyaz-mand agar jaan-e-bazm-e-naz nahin

KHalish ke sath taDap hai taDap ke sath KHalish

hamare zahir-o-baatin mein imtiyaz nahin

ye wo kahe jo zamiron ka paDhne wala hai

talab nahin hai jo dast-e-talab daraaz nahin

abhi karam mein yaqinan sitam bhi shamil hai

ki dil maal-e-mohabbat se be-niyaz nahin

paDa hai in se mohabbat ka wasta 'naKHshab'

ki jin ko ishq-o-hawas mein kuchh imtiyaz nahin