wo kaun hai jo pas-e-chashm-e-tar nahin aata

vo kaun hai jo pas-e-chashm-e-tar nahīñ aatā

samajh to aatā hai lekin nazar nahīñ aatā

agar ye tum ho to sābit karo ki ye tum ho

gayā huā to koī lauT kar nahīñ aatā

ye dil bhī kaisā shajar hai ki jis kī shāḳhoñ par

parinde aate haiñ lekin samar nahīñ aatā

ye jam.a ḳharch zabānī hai us ke baare meñ

koī bhī shaḳhs use dekh kar nahīñ aatā

hamārī ḳhaak pe andhī havā kā pahra hai

use ḳhabar hai yahāñ kūza-gar nahīñ aatā

ye baat sach hai ki is ko bhulā diyā maiñ ne

magar yaqīñ mujhe is baat par nahīñ aatā

nazar jamā.e rakhūñgā maiñ chāñd par 'tābish'

ki jab talak ye parinda utar nahīñ aatā

wo kaun hai jo pas-e-chashm-e-tar nahin aata

samajh to aata hai lekin nazar nahin aata

agar ye tum ho to sabit karo ki ye tum ho

gaya hua to koi lauT kar nahin aata

ye dil bhi kaisa shajar hai ki jis ki shaKHon par

parinde aate hain lekin samar nahin aata

ye jama KHarch zabani hai us ke bare mein

koi bhi shaKHs use dekh kar nahin aata

hamari KHak pe andhi hawa ka pahra hai

use KHabar hai yahan kuza-gar nahin aata

ye baat sach hai ki is ko bhula diya main ne

magar yaqin mujhe is baat par nahin aata

nazar jamae rakhunga main chand par 'tabish'

ki jab talak ye parinda utar nahin aata