wo kaun hain phulon ki hifazat nahin karte

vo kaun haiñ phūloñ kī hifāzat nahīñ karte

sunte haiñ jo ḳhushbū se mohabbat nahīñ karte

tum ho ki abhī shahr meñ masrūf bahut ho

ham haiñ ki abhī zikr-e-shahādat nahīñ karte

qur.ān kā mafhūm unheñ kaun batā.e

āñkhoñ se jo chehroñ kī tilāvat nahīñ karte

sāhil se sunā karte haiñ lahroñ kī kahānī

ye Thahre hue log baġhāvat nahīñ karte

ham bhī tire beTe haiñ zarā dekh hameñ bhī

ai ḳhāk-e-vatan tujh se shikāyat nahīñ karte

is mausam-e-jam.hūr meñ vo gul bhī khile haiñ

jo sāhib-e-ālam kī himāyat nahīñ karte

ham banda-e-nāchīz gunahgār haiñ lekin

vo bhī to zarā bārish-e-rahmat nahīñ karte

chehre haiñ ki sau rañg meñ hote haiñ numāyāñ

ā.īne magar koī siyāsat nahīñ karte

shabnam ko bharosa hai bahut barg-e-amāñ par

'ḳhurshīd' bhī dānista qayāmat nahīñ karte

wo kaun hain phulon ki hifazat nahin karte

sunte hain jo KHushbu se mohabbat nahin karte

tum ho ki abhi shahr mein masruf bahut ho

hum hain ki abhi zikr-e-shahadat nahin karte

quran ka mafhum unhen kaun batae

aankhon se jo chehron ki tilawat nahin karte

sahil se suna karte hain lahron ki kahani

ye Thahre hue log baghawat nahin karte

hum bhi tere beTe hain zara dekh hamein bhi

ai KHak-e-watan tujh se shikayat nahin karte

is mausam-e-jamhur mein wo gul bhi khile hain

jo sahib-e-alam ki himayat nahin karte

hum banda-e-nachiz gunahgar hain lekin

wo bhi to zara barish-e-rahmat nahin karte

chehre hain ki sau rang mein hote hain numayan

aaine magar koi siyasat nahin karte

shabnam ko bharosa hai bahut barg-e-aman par

'KHurshid' bhi danista qayamat nahin karte