wo kaun tha jo barsar-e-paikar mujh mein tha

vo kaun thā jo barsar-e-paikār mujh meñ thā

andhī anā thī nashsha-e-pindār mujh meñ thā

ik jang ḳhair-o-shar kī thī barpā vajūd meñ

ik jazba thā jo barsar-e-paikār mujh meñ thā

tū dasht-e-be-hisī meñ Thahartā bhī kab talak

ai jazba-e-junūñ tirā iz.hār mujh meñ thā

kaise nibard-āzmā dushman se ho gayā

vahshī havā sā koī to fankār mujh meñ thā

duniyā ḳharīd lī thī magar ye ḳhabar na thī

mere vajūd kā bhī ḳharīdār mujh meñ thā

thiiñ ḳhvāb ḳhvāb āñkheñ dar-e-yār par lagī

kahtā maiñ kaise dīda-e-bedār mujh meñ thā

chuntā rahā guloñ kī tarah ḳhār-ḳhār zaḳhm

jaise ki koī shahr-e-dil-āzār mujh meñ thā

dushvār ho ga.ī thī tumhārī talāsh bhī

vo kaun thā jo sāya-e-dīvār mujh meñ thā

kyoñ sher-e-shor-ḳhez hai barham the vo 'nazar'

kyoñ itnā tez-tar mirā iz.hār mujh meñ thā

wo kaun tha jo barsar-e-paikar mujh mein tha

andhi ana thi nashsha-e-pindar mujh mein tha

ek jang KHair-o-shar ki thi barpa wajud mein

ek jazba tha jo barsar-e-paikar mujh mein tha

tu dasht-e-be-hisi mein Thaharta bhi kab talak

ai jazba-e-junun tera izhaar mujh mein tha

kaise nibard-azma dushman se ho gaya

wahshi hawa sa koi to fankar mujh mein tha

duniya KHarid li thi magar ye KHabar na thi

mere wajud ka bhi KHaridar mujh mein tha

thin KHwab KHwab aankhen dar-e-yar par lagi

kahta main kaise dida-e-bedar mujh mein tha

chunta raha gulon ki tarah KHar-KHar zaKHm

jaise ki koi shahr-e-dil-azar mujh mein tha

dushwar ho gai thi tumhaari talash bhi

wo kaun tha jo saya-e-diwar mujh mein tha

kyon sher-e-shor-KHez hai barham the wo 'nazar'

kyon itna tez-tar mera izhaar mujh mein tha