وہ خرد مند یہ بے ہوش وہ سودائی ہے

وہ خرد مند یہ بے ہوش وہ سودائی ہے

جیسے دنیا تری چوکھٹ پہ سمٹ آئی ہے

تذکرے قوس قزح کے مرے ہونٹوں پہ ملے

گویا آنکھوں میں فقط آپ کی انگڑائی ہے

چاند چہرے سے تو روشن ہے مگر دل کا سیاہ

یہ حقیقت مجھے صرف آپ نے سمجھائی ہے

غم عقبیٰ کی خبر خیر خدا ہی جانے

غم دنیا سے تو برسوں کی شناسائی ہے

کسی مجبور محبت نے وہی نام لیا

دیر تک دل کے دھڑکنے کی صدا آئی ہے

میں سمجھتا ہوں امیروں کے مقدر چمکے

لوگ کہتے ہیں غریبوں کی پذیرائی ہے

چند سکوں کے عوض باپ کی چوکھٹ بھی گئی

جس نے احسان کیا ہے وہ مرا بھائی ہے