wo KHud-parast hai aur KHud-shanas main bhi nahin

vo ḳhud-parast hai aur ḳhud-shanās maiñ bhī nahīñ

fareb-ḳhurda-e-vahm-o-qayās maiñ bhī nahīñ

fazā-e-shahr-e-talab hai anā-guzīda bahut

adā-shanās-e-rah-e-iltimās maiñ bhī nahīñ

maiñ kyuuñ kahūñ ki zamāna nahīñ hai raas mujhe

maiñ dekhtā huuñ zamāne ko raas maiñ bhī nahīñ

vo faisle kī ghaḌī thī kaḌī so biit ga.ī

bichhaḌ ke tujh se kuchh aisā udaas maiñ bhī nahīñ

ye vāqi.a ki tujhe khal rahī hai tanhā.ī

ye hādisa ki tire ās-pās maiñ bhī nahīñ

huā kare jo hai 'ḳhāvar' fazā ḳhilāf mire

asīr-e-halqa-e-ḳhauf-o-hirās maiñ bhī nahīñ

wo KHud-parast hai aur KHud-shanas main bhi nahin

fareb-KHurda-e-wahm-o-qayas main bhi nahin

faza-e-shahr-e-talab hai ana-guzida bahut

ada-shanas-e-rah-e-iltimas main bhi nahin

main kyun kahun ki zamana nahin hai ras mujhe

main dekhta hun zamane ko ras main bhi nahin

wo faisle ki ghaDi thi kaDi so bit gai

bichhaD ke tujh se kuchh aisa udas main bhi nahin

ye waqia ki tujhe khal rahi hai tanhai

ye hadisa ki tere aas-pas main bhi nahin

hua kare jo hai 'KHawar' faza KHilaf mere

asir-e-halqa-e-KHauf-o-hiras main bhi nahin