wo KHush-jamal na ho chehra aaftab na ho

vo ḳhush-jamāl na ho chehra āftāb na ho

magar kisī meñ use dekhne kī taab na ho

agarche us kā irāda ho kāmyābī kā

magar vo apne irāde meñ kāmyāb na ho

na hoñ shumār diye jaa.eñ itne zaḳhm hameñ

sitam ho itnā ki jis kā koī hisāb na ho

nichoḌtā rahūñ tujh lab se maiñ sharāb-e-hayāt

so kar du'ā ki tirā zā.iqa ḳharāb na ho

vo ḳhush-badan ki tamanna ho jis ko chhūne kī

ḳhudā kare ki kabhī tujh ko dastyāb na ho

ki kāTnī hī na paḌ jaa.e 'umr bhar kī sazā

kisī se jurm-e-mohabbat kā irtikāb na ho

bacho jo tum ko nigal jaa.e aisī ḳhalvat se

aur aisī bazm se jis meñ koī sharāb na ho

hasīn bhī ho zehānat bhī ḳhuub ho lekin

tamām 'umr kisī kā vo intiḳhāb na ho

vo shaḳhs jis ko mohabbat nahīñ huī ho kabhī

aur ek baaġh ki jis meñ koī gulāb na ho

mujhe safar kī ijāzat to mil ga.ī hai 'doraib'

magar ye Dar hai ki ab rāsta ḳharāb na ho

wo KHush-jamal na ho chehra aaftab na ho

magar kisi mein use dekhne ki tab na ho

agarche us ka irada ho kaamyabi ka

magar wo apne irade mein kaamyab na ho

na hon shumar diye jaen itne zaKHm hamein

sitam ho itna ki jis ka koi hisab na ho

nichoDta rahun tujh lab se main sharab-e-hayat

so kar du'a ki tera zaiqa KHarab na ho

wo KHush-badan ki tamanna ho jis ko chhune ki

KHuda kare ki kabhi tujh ko dastyab na ho

ki kaTni hi na paD jae 'umr bhar ki saza

kisi se jurm-e-mohabbat ka irtikab na ho

bacho jo tum ko nigal jae aisi KHalwat se

aur aisi bazm se jis mein koi sharab na ho

hasin bhi ho zehanat bhi KHub ho lekin

tamam 'umr kisi ka wo intiKHab na ho

wo shaKHs jis ko mohabbat nahin hui ho kabhi

aur ek bagh ki jis mein koi gulab na ho

mujhe safar ki ijazat to mil gai hai 'doraib'

magar ye Dar hai ki ab rasta KHarab na ho