wo kisi bhi aks-e-jamal mein nahin aaega

vo kisī bhī aks-e-jamāl meñ nahīñ aa.egā

vo javāb hai to savāl meñ nahīñ aa.egā

nahīñ aa.egā vo kisī bhī harf o bayān meñ

vo kisī nazīr-o-misāl meñ nahīñ aa.egā

use Dhālnā hai ḳhayāl meñ kisī aur Dhab

vo shabāhat-o-ḳhad-o-ḳhāl meñ nahīñ aa.egā

vo jo shahsavār hai teġh-zan rah-e-zindagī

mire saath vaqt-e-zavāl meñ nahīñ aa.egā

yahāñ kaun thā jo salāmtī se guzar gayā

yahāñ kaun hai jo vabāl meñ nahīñ aa.egā

use lā.ūñgā maiñ sukūt-e-harf-o-sadā meñ bhī

vo suḳhan kabhī jo savāl meñ nahīñ aa.egā

jo haiñ muntazir baḌī der se unheñ kyā ḳhabar

nahīñ aa.egā kisī haal meñ nahīñ aa.egā

wo kisi bhi aks-e-jamal mein nahin aaega

wo jawab hai to sawal mein nahin aaega

nahin aaega wo kisi bhi harf o bayan mein

wo kisi nazir-o-misal mein nahin aaega

use Dhaalna hai KHayal mein kisi aur Dhab

wo shabahat-o-KHad-o-KHal mein nahin aaega

wo jo shahsawar hai tegh-zan rah-e-zindagi

mere sath waqt-e-zawal mein nahin aaega

yahan kaun tha jo salamti se guzar gaya

yahan kaun hai jo wabaal mein nahin aaega

use launga main sukut-e-harf-o-sada mein bhi

wo suKHan kabhi jo sawal mein nahin aaega

jo hain muntazir baDi der se unhen kya KHabar

nahin aaega kisi haal mein nahin aaega