wo kisi ki zindagi ka aasra pahle se tha

vo kisī kī zindagī kā aasrā pahle se thā

kyā samajh baiThe use jo bevafā pahle se thā

mere us ke darmiyāñ ye fāsla pahle se thā

dukh to ye hai ranjishoñ kā silsila pahle se thā

kyoñ na lagtī aag jab sho'le bhī shāmil dil ke the

aur is par ye sitam ghar meñ diyā pahle se thā

koī dhoke se use merā na qātil kah uThe

us ke hāthoñ par to ye rang-e-hinā pahle se thā

vo hamārī dāstāñ sunñe se pahle ro diyā

kyā hamāre dard se vo āshnā pahle se thā

baat khulne par vo le baiThā purānī ranjisheñ

aisā lagtā hai ki vo mujh se ḳhafā pahle se thā

ab javāñ ho kar ġhurūr-e-husn se mad.hosh hai

kam-sinī meñ bhī vo zālim kaj-adā pahle se thā

hāl-e-dil kyūñkar likhā 'nāsir' ye tū ne kyā kiyā

kyā likheñge ḳhat meñ vo tujh ko patā pahle se thā

wo kisi ki zindagi ka aasra pahle se tha

kya samajh baiThe use jo bewafa pahle se tha

mere us ke darmiyan ye fasla pahle se tha

dukh to ye hai ranjishon ka silsila pahle se tha

kyon na lagti aag jab sho'le bhi shamil dil ke the

aur is par ye sitam ghar mein diya pahle se tha

koi dhoke se use mera na qatil kah uThe

us ke hathon par to ye rang-e-hina pahle se tha

wo hamari dastan sunne se pahle ro diya

kya hamare dard se wo aashna pahle se tha

baat khulne par wo le baiTha purani ranjishen

aisa lagta hai ki wo mujh se KHafa pahle se tha

ab jawan ho kar ghurur-e-husn se madhosh hai

kam-sini mein bhi wo zalim kaj-ada pahle se tha

haal-e-dil kyunkar likha 'nasir' ye tu ne kya kiya

kya likhenge KHat mein wo tujh ko pata pahle se tha