wo kitna dil-nashin kitna hasin hai

vo kitnā dil-nashīñ kitnā hasīñ hai

use bhī is kā andāza nahīñ hai

tasavvur meñ koī zohra-jabīñ hai

nigāhoñ meñ har ik manzar hasīñ hai

mohabbat ho ga.ī pākīza ya.anī

koī armān ab dil meñ nahīñ hai

nazar aatā nahīñ apne ko maiñ ḳhud

ye kyā sahar-e-nigāh-e-avvalīñ hai

maiñ kyā jā.ūñ ab us ke āstāñ par

jabīñ sajdoñ ke qābil hī nahīñ hai

ye merāj-e-tasavvur hai ki vo ab

nazar ke sāmne hai aur nahīñ hai

vo manzil aa ga.ī dīvāngī kī

na dāman hai na jeb-o-āstīñ hai

kisī ko kam kisī ko hai ziyāda

hai kaun aisā ki jis ko ġham nahīñ hai

muqaddar par huuñ maiñ ai 'nūr' nāzāñ

dar-e-jānāñ hai aur merī jabīñ hai

wo kitna dil-nashin kitna hasin hai

use bhi is ka andaza nahin hai

tasawwur mein koi zohra-jabin hai

nigahon mein har ek manzar hasin hai

mohabbat ho gai pakiza yani

koi arman ab dil mein nahin hai

nazar aata nahin apne ko main KHud

ye kya sahar-e-nigah-e-awwalin hai

main kya jaun ab us ke aastan par

jabin sajdon ke qabil hi nahin hai

ye meraj-e-tasawwur hai ki wo ab

nazar ke samne hai aur nahin hai

wo manzil aa gai diwangi ki

na daman hai na jeb-o-astin hai

kisi ko kam kisi ko hai ziyaada

hai kaun aisa ki jis ko gham nahin hai

muqaddar par hun main ai 'nur' nazan

dar-e-jaanan hai aur meri jabin hai