wo kitna TuT chuka hai ye koi jaan na le

vo kitnā TuuT chukā hai ye koī jaan na le

ġham-e-hayāt tū aur us kā imtihān na le

nasīb hogī tujhe manzil-e-murād ik din

kisī shajar kā koī bhī tū sā.ebān na le

usī pe chhoḌ de ab jo hai kā.enāt kā rab

ye terā kaam nahīñ tū kisī kī jaan na le

tire adū haiñ tirī ghaat meñ yahāñ har sū

tū is nagar meñ kirā.e kā ab makān na le

maiñ us kī bazm se tab tak na uTThūñgā 'tābāñ'

mirā vo mashvara jab tak ki aaj maan na le

wo kitna TuT chuka hai ye koi jaan na le

gham-e-hayat tu aur us ka imtihan na le

nasib hogi tujhe manzil-e-murad ek din

kisi shajar ka koi bhi tu saeban na le

usi pe chhoD de ab jo hai kaenat ka rab

ye tera kaam nahin tu kisi ki jaan na le

tere adu hain teri ghat mein yahan har su

tu is nagar mein kirae ka ab makan na le

main us ki bazm se tab tak na uTThunga 'taban'

mera wo mashwara jab tak ki aaj man na le