wo kiya gaya musallat mera haal dekhne ko

vo kiyā gayā musallat mirā haal dekhne ko

ki urūj-e-zindagānī kā zavāl dekhne ko

ye ajiib mas.ala hai mire us ke darmiyāñ bhī

vo javāb le ke aayā hai savāl dekhne ko

tū badal ke apnā chehra baḌā shādmāñ hai lekin

koī aa.ina to rakh le ḳhad-o-ḳhāl dekhne ko

jahāñ kal basā huā thā mirā shahr ab hai malba

mujhe us ne zindagī dī ye vabāl dekhne ko

na to daad kī tamanna na to shohratoñ kī ḳhvāhish

mirā fan hī aa.ina hai ye kamāl dekhne ko

jo khaḌā huā hai 'anvar' liye sang mere aage

vo hai muztarib lahū kā ye ubaal dekhne ko

wo kiya gaya musallat mera haal dekhne ko

ki uruj-e-zindagani ka zawal dekhne ko

ye ajib masala hai mere us ke darmiyan bhi

wo jawab le ke aaya hai sawal dekhne ko

tu badal ke apna chehra baDa shadman hai lekin

koi aaina to rakh le KHad-o-KHal dekhne ko

jahan kal basa hua tha mera shahr ab hai malba

mujhe us ne zindagi di ye wabaal dekhne ko

na to dad ki tamanna na to shohraton ki KHwahish

mera fan hi aaina hai ye kamal dekhne ko

jo khaDa hua hai 'anwar' liye sang mere aage

wo hai muztarib lahu ka ye ubaal dekhne ko