wo kya gaya ki sath mein qarar bhi chala gaya

vo kyā gayā ki saath meñ qarār bhī chalā gayā

vo roz milne-julne kā hañsī kā silsila gayā

vo le gayā hai saath meñ vajūd merā chhīn kar

phir aa.egā vo lauT kar yaqīn bhī dilā gayā

ki jaise har nivāle se namak koī nikāl le

guzar rahī hai zindagī pe zā.iqa chalā gayā

kyā us ke dil meñ baat thī patā nahīñ ye kyoñ kiyā

jalā diyā bujhā gayā bujhā diyā jalā gayā

vo zindagī meñ yak-ba-yak jo chhā gayā havās par

ki jaise kui zalzala ho bām-o-dar hilā gayā

vo chāhe ab karam kare yā de ḳhatāoñ kī sazā

ki kuchh bhī kahne-sunñe kā ab hausla chalā gayā

udaas udaas āñkhoñ se kahā jab us ne alvidā.a

na phir rahīñ shikāyateñ jo thā bhī vo gila gayā

phir us ke baa'd shahr meñ vo raunaqeñ nahīñ rahīñ

rahā vo jab talak yahāñ sabhī kā ġham bhulā gayā

kyoñ soch meñ paḌā huā hai 'sāgar' ab tū mustaqil

burā jo vaqt aaya thā kabhī kā vo chalā gayā

wo kya gaya ki sath mein qarar bhi chala gaya

wo roz milne-julne ka hansi ka silsila gaya

wo le gaya hai sath mein wajud mera chhin kar

phir aaega wo lauT kar yaqin bhi dila gaya

ki jaise har niwale se namak koi nikal le

guzar rahi hai zindagi pe zaiqa chala gaya

kya us ke dil mein baat thi pata nahin ye kyon kiya

jala diya bujha gaya bujha diya jala gaya

wo zindagi mein yak-ba-yak jo chha gaya hawas par

ki jaise kui zalzala ho baam-o-dar hila gaya

wo chahe ab karam kare ya de KHataon ki saza

ki kuchh bhi kahne-sunne ka ab hausla chala gaya

udas udas aankhon se kaha jab us ne alwidaa

na phir rahin shikayaten jo tha bhi wo gila gaya

phir us ke ba'd shahr mein wo raunaqen nahin rahin

raha wo jab talak yahan sabhi ka gham bhula gaya

kyon soch mein paDa hua hai 'sagar' ab tu mustaqil

bura jo waqt aaya tha kabhi ka wo chala gaya