wo lakh puchhe agar tujhse KHairiyat meri

vo laakh pūchhe agar tujh se ḳhairiyat merī

na kahnā us se sabā tū ye kaifiyat merī

maiñ ek lamha huuñ guzre hue zamāne kā

tumheñ ḳhabar hī nahīñ kyā hai ahmiyat merī

maiñ Duubā rahtā huuñ fikr-e-suḳhan ke dariyā meñ

koī to dekhe zarā aa ke mahviyat merī

tumhāre pyaar ne mash.hūr kar diyā varna

maiñ ik ġharīb bhalā kyā hai haisiyat merī

piye haiñ shukr adā karke sabr ke sāġhar

huī hai sāya-e-sābir meñ tarbiyat merī

maiñ apnī maañ ke qadam chuum kar nikaltā huuñ

isī liye to chamaktī hai shaḳhsiyat merī

zarūr mujh meñ chhupā hai 'jamīl' vo aa kar

banī hai rashk ke qābil jo shaḳhsiyat merī

wo lakh puchhe agar tujh se KHairiyat meri

na kahna us se saba tu ye kaifiyat meri

main ek lamha hun guzre hue zamane ka

tumhein KHabar hi nahin kya hai ahmiyat meri

main Duba rahta hun fikr-e-suKHan ke dariya mein

koi to dekhe zara aa ke mahwiyat meri

tumhaare pyar ne mashhur kar diya warna

main ek gharib bhala kya hai haisiyat meri

piye hain shukr ada karke sabr ke saghar

hui hai saya-e-sabir mein tarbiyat meri

main apni man ke qadam chum kar nikalta hun

isi liye to chamakti hai shaKHsiyat meri

zarur mujh mein chhupa hai 'jamil' wo aa kar

bani hai rashk ke qabil jo shaKHsiyat meri