wo lamha mere liye kis qadar azab ka tha

vo lamha mere liye kis qadar azaab kā thā

haqīqatoñ pe gumāñ jab ḳhayāl-o-ḳhvāb kā thā

tamām-umr ham apnī anā meñ mast rahe

vo nashsha sab se alag thā jo is sharāb meñ thā

kahāñ ga.e mire mausam vo ārzūoñ ke

kahāñ gayā jo zamāna mire shabāb kā thā

miTā diye the sabhī harf ġham kī bārish ne

ajiib haal mirī ziist kī kitāb kā thā

jalā na thā mire ghar meñ koī diyā jab tak

kahāñ ye rañg havāoñ ke pech-o-tāb kā thā

hue buland kuchh itne ki hosh hī na rahā

vo thā zamīn kā manzar ki māhtāb kā thā

uḌī hai aaj bahut ḳhaak us jagah 'ḳhāvar'

harā-bharā koī paudā jahāñ gulāb kā thā

wo lamha mere liye kis qadar azab ka tha

haqiqaton pe guman jab KHayal-o-KHwab ka tha

tamam-umr hum apni ana mein mast rahe

wo nashsha sab se alag tha jo is sharab mein tha

kahan gae mere mausam wo aarzuon ke

kahan gaya jo zamana mere shabab ka tha

miTa diye the sabhi harf gham ki barish ne

ajib haal meri zist ki kitab ka tha

jala na tha mere ghar mein koi diya jab tak

kahan ye rang hawaon ke pech-o-tab ka tha

hue buland kuchh itne ki hosh hi na raha

wo tha zamin ka manzar ki mahtab ka tha

uDi hai aaj bahut KHak us jagah 'KHawar'

hara-bhara koi pauda jahan gulab ka tha