wo lamhe bhule nahin rasm-o-rah ke ab tak

vo lamhe bhūle nahīñ rasm-o-rāh ke ab tak

tasavvurāt haiñ dil meñ gunāh ke ab tak

bahā ke le gayā sailāb gaañv ke manzar

gharauñde miT nahīñ paa.e haiñ chaah ke ab tak

tirī zabāñ se jo nikle the bad-duā bin kar

mujhe jalāte haiñ sho.ale vo aah ke ab tak

kisī zamāne meñ shāyad yahāñ pe maqtal thā

nishāñ batāte haiñ ye qasr shaah ke ab tak

vo ḳhvāb dekhe zamāna guzar gayā lekin

sulag rahe haiñ darīche nigāh ke ab tak

jahāñ pe saa.e larazte haiñ terī yādoñ ke

bulā rahe haiñ vahī moḌ raah ke ab tak

kahī thī daar pe kal haq kī baat 'ahsan' ne

salīb haath meñ hai sarbarāh ke ab tak

wo lamhe bhule nahin rasm-o-rah ke ab tak

tasawwuraat hain dil mein gunah ke ab tak

baha ke le gaya sailab ganw ke manzar

gharaunde miT nahin pae hain chah ke ab tak

teri zaban se jo nikle the bad-dua bin kar

mujhe jalate hain shoale wo aah ke ab tak

kisi zamane mein shayad yahan pe maqtal tha

nishan batate hain ye qasr shah ke ab tak

wo KHwab dekhe zamana guzar gaya lekin

sulag rahe hain dariche nigah ke ab tak

jahan pe sae larazte hain teri yaadon ke

bula rahe hain wahi moD rah ke ab tak

kahi thi dar pe kal haq ki baat 'ahsan' ne

salib hath mein hai sarbarah ke ab tak