وہ لے رہا تھا مرا امتحان قسطوں میں

وہ لے رہا تھا مرا امتحان قسطوں میں

خبر نہ تھی کہ نکالے گا جان قسطوں میں

تمام عمر بھٹکتا رہا میں خانہ بدوش

خرید بھی نہ سکا اک مکان قسطوں میں

تمام قرض ادا کر کے ساہوکاروں کا

بچا ہی لوں گا بزرگوں کی آن قسطوں میں

ہم ایک ساتھ ہر اک شے خریدتے کیوں کر

ہم ایسے لوگ بڑھاتے ہیں شان قسطوں میں

بسا رہا ہے ہر اک فرد اک الگ ہی جہاں

بکھر رہا ہے ہر اک خاندان قسطوں میں

ہم اپنے بچوں کو اردو سے رکھ کے ناواقف

مٹا رہے ہیں سنہری زبان قسطوں میں