wo log bhi hain jo maujon se Dar gae honge

vo log bhī haiñ jo maujoñ se Dar ga.e hoñge

magar jo Duub ga.e paar utar ga.e hoñge

lagī ye fikr na.ī dil ko aa ke manzil par

kahāñ bhaTak ke mire ham-safar ga.e hoñge

palaT ke aañkh meñ vo mauj-e-ḳhūñ nahīñ aa.ī

chaḌhe hue the jo dariyā utar ga.e hoñge

chale to ek hī raste pe ham magar na mile

mile bhī hoñge to bach kar guzar ga.e hoñge

jo maut se na Dare vo bhī tere saath nahīñ

ki zindagī ke savāloñ se Dar ga.e hoñge

jahāñ ye baaġh hai pahle yahāñ bayābāñ thā

zarūr idhar se tire ḳhush-nazar ga.e hoñge

jo shāh-rāhoñ pe dekhe haiñ log patthar ke

talab meñ jiine kī ye sū-e-zar ga.e hoñge

hamārī kisht-e-dil-o-jāñ se us kī mizhgāñ tak

ye silsile tire ai chashm-e-tar ga.e hoñge

jo mil gayā hai to ab mujh se hāl-e-hijr na pūchh

kisī tarah se vo din bhī guzar ga.e hoñge

'salīm' ziist to mushkil thī be-dayāroñ kī

vatan se duur kahīñ jā ke mar ga.e hoñge

wo log bhi hain jo maujon se Dar gae honge

magar jo Dub gae par utar gae honge

lagi ye fikr nai dil ko aa ke manzil par

kahan bhaTak ke mere ham-safar gae honge

palaT ke aankh mein wo mauj-e-KHun nahin aai

chaDhe hue the jo dariya utar gae honge

chale to ek hi raste pe hum magar na mile

mile bhi honge to bach kar guzar gae honge

jo maut se na Dare wo bhi tere sath nahin

ki zindagi ke sawalon se Dar gae honge

jahan ye bagh hai pahle yahan bayaban tha

zarur idhar se tere KHush-nazar gae honge

jo shah-rahon pe dekhe hain log patthar ke

talab mein jine ki ye su-e-zar gae honge

hamari kisht-e-dil-o-jaan se us ki mizhgan tak

ye silsile tere ai chashm-e-tar gae honge

jo mil gaya hai to ab mujh se haal-e-hijr na puchh

kisi tarah se wo din bhi guzar gae honge

'salim' zist to mushkil thi be-dayaron ki

watan se dur kahin ja ke mar gae honge