wo log jinko hai ab KHud-kushi se dilchaspi

vo log jin ko hai ab ḳhud-kushī se dilchaspī

kabhī bahut thī unheñ zindagī se dilchaspī

hai rasm-o-rāh bas apne mafād kī had tak

yahāñ kahāñ hai kisī ko kisī se dilchaspī

muāmlāt kiye jaa.eñ ab sipurd un ke

muāmlāt meñ jo leñ ḳhushī se dilchaspī

na samt dekhī na rasta ajiib aalam thā

hameñ thī sirf tirī ham-rahī se dilchaspī

qubūl añdherā ḳhushī se koī nahīñ kartā

kise nahīñ hai bhalā raushnī se dilchaspī

udhar jhukāo to hotā hai jā ke barsoñ meñ

hai jin umuur meñ tum ko abhī se dilchaspī

'na.īm' saare hī insāñ haiñ lā.eq-e-takrīm

sabhī se uns hai ham ko sabhī se dilchaspī

wo log jin ko hai ab KHud-kushi se dilchaspi

kabhi bahut thi unhen zindagi se dilchaspi

hai rasm-o-rah bas apne mafad ki had tak

yahan kahan hai kisi ko kisi se dilchaspi

muamlat kiye jaen ab sipurd un ke

muamlat mein jo len KHushi se dilchaspi

na samt dekhi na rasta ajib aalam tha

hamein thi sirf teri ham-rahi se dilchaspi

qubul andhera KHushi se koi nahin karta

kise nahin hai bhala raushni se dilchaspi

udhar jhukao to hota hai ja ke barson mein

hai jin umur mein tum ko abhi se dilchaspi

'naim' sare hi insan hain laeq-e-takrim

sabhi se uns hai hum ko sabhi se dilchaspi