wo log waqt ko apna ghulam karte hain

vo log vaqt ko apnā ġhulām karte haiñ

jo hādsoñ ko adab se salām karte haiñ

tumhāre shahr meñ tasvīreñ boltī hoñgī

hamāre gaañv meñ patthar kalām karte haiñ

mirī suno to ye būḌhā daraḳht mat kaaTo

sunā hai is pe parinde qiyām karte haiñ

ham apne farz se ġhāfil kabhī nahīñ rahte

vafā kī rasm ko duniyā meñ aam karte haiñ

unhīñ qabīloñ pe fāqoñ kī bārisheñ barsīñ

jo apne khetoñ meñ din-rāt kaam karte haiñ

vaqār-e-ġhairat-e-qaumī ko sharm aatī hai

vatan meñ aise bhī kuchh log kaam karte haiñ

ye mustafā kā karam hai 'jamīl' par apne

tamām log mirā ehtirām karte haiñ

wo log waqt ko apna ghulam karte hain

jo hadson ko adab se salam karte hain

tumhaare shahr mein taswiren bolti hongi

hamare ganw mein patthar kalam karte hain

meri suno to ye buDha daraKHt mat kaTo

suna hai is pe parinde qiyam karte hain

hum apne farz se ghafil kabhi nahin rahte

wafa ki rasm ko duniya mein aam karte hain

unhin qabilon pe faqon ki barishen barsin

jo apne kheton mein din-raat kaam karte hain

waqar-e-ghairat-e-qaumi ko sharm aati hai

watan mein aise bhi kuchh log kaam karte hain

ye mustafa ka karam hai 'jamil' par apne

tamam log mera ehtiram karte hain