wo mai-kash hun ki jab mahfil mein mera nam aata hai

vo mai-kash huuñ ki jab mahfil meñ merā naam aatā hai

surāhī jhūmtī hai vajd meñ ḳhud jaam aatā hai

hamīñ ne ḳhuun se ai bāġhbāñ sīñchā gulistāñ ko

hamīñ par bevafā.ī kā yahāñ ilzām aatā hai

asīrī kā tirā shikva abas ai tā.ir-e-nādāñ

havas daane kī jo rakhtā hai zer-e-dām aatā hai

harīm-e-nāz ke pardoñ ko jumbish hone vaalī hai

zabāñ par tere dīvāne ke terā naam aatā hai

yahī anjām hotā hai mohabbat karne vāloñ kā

chhalak aate haiñ aañsū jab hañsī kā naam aatā hai

'zuhūr'-e-bevafā kī bevafā.ī ke gile kab tak

vafādāroñ meñ ab dekheñ ki kis kā naam aatā hai

wo mai-kash hun ki jab mahfil mein mera nam aata hai

surahi jhumti hai wajd mein KHud jam aata hai

hamin ne KHun se ai baghban sincha gulistan ko

hamin par bewafai ka yahan ilzam aata hai

asiri ka tera shikwa abas ai tair-e-nadan

hawas dane ki jo rakhta hai zer-e-dam aata hai

harim-e-naz ke pardon ko jumbish hone wali hai

zaban par tere diwane ke tera nam aata hai

yahi anjam hota hai mohabbat karne walon ka

chhalak aate hain aansu jab hansi ka nam aata hai

'zuhur'-e-bewafa ki bewafai ke gile kab tak

wafadaron mein ab dekhen ki kis ka nam aata hai