wo main nahin ki chhupae phirun kanar mein dil

vo maiñ nahīñ ki chhupā.e phirūñ kanār meñ dil

jo lene vaalā mile pheñk duuñ hazār meñ dil

gahe sarishk meñ hai gaahe intizār meñ hai

bahut dinoñ se hai āñkhoñ ke iḳhtiyār meñ dil

na ḳhauf-e-ġham hai ki aatā nahīñ kanār meñ dil

machal gayā mirā āġhosh-e-ġham-gusār meñ dil

hazār arsa-e-mehshar ho sair ke qābil

uThegā kaun agar lag gayā mazār meñ dil

burā ho soz-e-darūñ kā badal ga.ī sūrat

uḌī vo ḳhāk-e-jigar aT gayā ġhubār meñ dil

tumhīñ batāo ki qaabū hai kyā tabī.at par

tumhīñ kaho kahīñ hote haiñ iḳhtiyār meñ dil

uThā qadam ko zarā tifl-e-ashk āhista

ki misl shīsha-e-bashkasta hai kanār meñ dil

uThegā hashr lagā.egā koī to Thokar

ki raah dekhte haiñ rakh ke rahguzār meñ dil

vahī hai nāla-e-pur-dard nā-tavānī meñ

ye naġhma taar meñ hai yā hai jism-e-zār meñ dil

tumhāre tiir kī hasrat ko bhī jagah mil jaa.e

jo ek aur bhī nikle dil-e-figār meñ dil

ye kis kā ābla-pā sū-e-dasht aatā hai

piroyā qais kā lailā ne ḳhaar ḳhaar meñ dil

tumhīñ ne ḳhāk-e-kudūrat bharī hai pahlū meñ

tumhīñ ne dekhā thā ā.īna sā kanār meñ dil

mire hī nāloñ ne raḳhne kiye haiñ patthar meñ

mirā hī garm-e-fuġhāñ hai har ik sharār meñ dil

bajā.e ashk-e-nadāmat umīd-e-rahmat par

nikal ke aaya hai chashm-e-gunāhgār meñ dil

kahāñ dikhā.iye 'sho.ala' hujūm-e-hasrat meñ

kahāñ batā.iye ġham-hā-e-be-shumār meñ dil

wo main nahin ki chhupae phirun kanar mein dil

jo lene wala mile phenk dun hazar mein dil

gahe sarishk mein hai gahe intizar mein hai

bahut dinon se hai aankhon ke iKHtiyar mein dil

na KHauf-e-gham hai ki aata nahin kanar mein dil

machal gaya mera aaghosh-e-gham-gusar mein dil

hazar arsa-e-mehshar ho sair ke qabil

uThega kaun agar lag gaya mazar mein dil

bura ho soz-e-darun ka badal gai surat

uDi wo KHak-e-jigar aT gaya ghubar mein dil

tumhin batao ki qabu hai kya tabiat par

tumhin kaho kahin hote hain iKHtiyar mein dil

uTha qadam ko zara tifl-e-ashk aahista

ki misl shisha-e-bashkasta hai kanar mein dil

uThega hashr lagaega koi to Thokar

ki rah dekhte hain rakh ke rahguzar mein dil

wahi hai nala-e-pur-dard na-tawani mein

ye naghma tar mein hai ya hai jism-e-zar mein dil

tumhaare tir ki hasrat ko bhi jagah mil jae

jo ek aur bhi nikle dil-e-figar mein dil

ye kis ka aabla-pa su-e-dasht aata hai

piroya qais ka laila ne KHar KHar mein dil

tumhin ne KHak-e-kudurat bhari hai pahlu mein

tumhin ne dekha tha aaina sa kanar mein dil

mere hi nalon ne raKHne kiye hain patthar mein

mera hi garm-e-fughan hai har ek sharar mein dil

bajae ashk-e-nadamat umid-e-rahmat par

nikal ke aaya hai chashm-e-gunahgar mein dil

kahan dikhaiye 'shoala' hujum-e-hasrat mein

kahan bataiye gham-ha-e-be-shumar mein dil