wo masiha qabr par aata raha

vo masīhā qabr par aatā rahā

maiñ mue par roz jī jaatā rahā

zindagī kī ham ne mar-mar ke basar

vo but-e-tarsā jo tarsātā rahā

vaah baḳht-e-nā-rasā dekhā tujhe

nāma-bar se ḳhat kahīñ jaatā rahā

raah takte takte āḳhir jaañ ga.ī

vo taġhāful-kesh bas aatā rahā

dil to dene ko diyā par ham-nashīñ

haath maiñ mal mal ke pachhtātā rahā

dekh us ko ho gayā maiñ be-ḳhabar

dil yakāyak haath se jaatā rahā

kyā kahūñ kis tarah furqat meñ jiyā

ḳhūn-e-dil piitā to ġham khātā rahā

raat bhar us barq-vash kī yaad meñ

sail-e-ashk āñkhoñ se barsātā rahā

DhūñDhtā phirtā huuñ us ko jā-ba-jā

dil ḳhudā jaane kidhar jaatā rahā

us masīhā kī umīd-e-vasl meñ

shaam jiitā sub.h mar jaatā rahā

ishq kā 'ra.anā' maraz hai lā-davā

kab sunā tū ne ki vo jaatā rahā

wo masiha qabr par aata raha

main mue par roz ji jata raha

zindagi ki hum ne mar-mar ke basar

wo but-e-tarsa jo tarsata raha

wah baKHt-e-na-rasa dekha tujhe

nama-bar se KHat kahin jata raha

rah takte takte aaKHir jaan gai

wo taghaful-kesh bas aata raha

dil to dene ko diya par ham-nashin

hath main mal mal ke pachhtata raha

dekh us ko ho gaya main be-KHabar

dil yakayak hath se jata raha

kya kahun kis tarah furqat mein jiya

KHun-e-dil pita to gham khata raha

raat bhar us barq-wash ki yaad mein

sail-e-ashk aankhon se barsata raha

DhunDhta phirta hun us ko ja-ba-ja

dil KHuda jaane kidhar jata raha

us masiha ki umid-e-wasl mein

sham jita subh mar jata raha

ishq ka 'rana' maraz hai la-dawa

kab suna tu ne ki wo jata raha