wo mere haal-e-dil se is qadar bhi be-KHabar hoga

vo mere hāl-e-dil se is qadar bhī be-ḳhabar hogā

ḳhabar kyā thī ki yuuñ behis vo merā ham-safar hogā

ki ham to umr bhar laḌne kī ḳhvāhish le ke aa.e the

ḳhabar kyā thī ki vaqt-e-faisla yuuñ muḳhtasar hogā

charāġh-e-ġham jalāyā thā ujāloñ kī umīdoñ meñ

ḳhabar kyā thī mirī koshish kā ulTā hī asar hogā

dabe sho.aloñ ko bhaḌkāyā ki un kā āshiyāñ sulge

ḳhabar kyā thī jalegā jo mirā apnā hī ghar hogā

vo jab ruḳhsat huā us ko pukārā bhī nahīñ ham ne

ḳhabar kyā thī kī pachhtāvā hameñ phir umr bhar hogā

jahāñ merī har ik hasrat haqīqat meñ badal jaa.e

ḳhabar kyā thī mire ḳhvāboñ kā vo sāhil kidhar hogā

jise ham DhūñDhte phirte the ḳhvāboñ meñ ḳhayāloñ meñ

ḳhabar kyā thī vo sadiyoñ se hamārā muntazir hogā

wo mere haal-e-dil se is qadar bhi be-KHabar hoga

KHabar kya thi ki yun behis wo mera ham-safar hoga

ki hum to umr bhar laDne ki KHwahish le ke aae the

KHabar kya thi ki waqt-e-faisla yun muKHtasar hoga

charagh-e-gham jalaya tha ujalon ki umidon mein

KHabar kya thi meri koshish ka ulTa hi asar hoga

dabe shoalon ko bhaDkaya ki un ka aashiyan sulge

KHabar kya thi jalega jo mera apna hi ghar hoga

wo jab ruKHsat hua us ko pukara bhi nahin hum ne

KHabar kya thi ki pachhtawa hamein phir umr bhar hoga

jahan meri har ek hasrat haqiqat mein badal jae

KHabar kya thi mere KHwabon ka wo sahil kidhar hoga

jise hum DhunDhte phirte the KHwabon mein KHayalon mein

KHabar kya thi wo sadiyon se hamara muntazir hoga